Proposta inicial para a constitución da Asemblea

Asemblea do Movemento Social de Ferrolterra en apoio á
candidatura da Alternativa Galega de Esquerda.
28-9-2012
BORRADOR


Obxectivos:
a) Unir a todas as persoas mais activas da comarca en defensa da candidatura. Coñecerse e recoñecerse como participantes nese proxecto para conseguir apoio mutuo.
b) Asinar e facer público un manifesto de apoio.
c) Construír Comités Populares de Apoio a AGE

Organización e desenvolvemento:

1- Están convocadas a esta asemblea as persoas que a título individual queiran asistir, nomeadamente aquelas persoas que estean implicadas nos movementos sociais da comarca:

Plataforma en Defensa da Sanidade Pública; Plataforma contra o Malgasto; Comité Cidadá de Emerxencia; sectores da CIG, CCOO; SGHN, Verdegaia, Adega; AAVV; Colectivos culturais ( Lefre de Caldereta, Fuco Buxán, A Revolta de Trasancos, As. López Bouza), Marcha Mundial das Mulheres, Cooperativa Armeria, Comite Lazos Anti-Sida, a Rede de Apoio Mutuo do Encontro Social de Ferrol Terra... (desafiuzamentos), as Hortas Comunitarias, Acción Directa polos Espazos Públicos, Radio Filispim, 15M....

2- Todas as persoas convidadas terían que recibir  antes da asemblea un borrador de manifesto para corrixir, opinar, asinar, nesa asemblea.

3-  O desenvolvemento da asemblea seria en tres partes:

1º Apertura da Asemblea por parte de persoas da Comisión organizadora para explicar os obxectivos.

2º Pediriamos a aquelas persoas que desexen tomar a palabra para explicar o seu apoio, e que cousa agardan de AGE (micrófono aberto). Seria, como expoñer o noso programa, narrado a través das persoas que participen na asemblea.

3º Presentariamos os Comités Populares de Apoio á candidatura de  AGE. Estes Comités deberían saír minimamente organizados da Asemblea, con persoas de contacto que organicen reunións e accións de propaganda pola súa conta. Poden ser sectoriais (sanidade, cultura, educación...), de centros de traballo (Navantia, Megasa, confrarias, comercio...) ou poden ser só de acción-propaganda (graffitis, murais, reparto, colantes, … pequenos mitins espontáneos...)

4º Convocariamos a unha primeira xornada de traballo para acondicionar o local de campaña que seria o punto de referencia ao longo destas semanas ( é posible ter local en Esteiro ou Caranza). Esta xornada de traballo seria un acto propagandístico importante “ o local da candidatura construído pola acción comunitaria, polo esforzo popular, igual que a forza que representamos”.

5º Durante o desenvolvemento da asemblea, é importante organizar un punto de atención ás crianzas. Hai persoas que se non facilitamos isto, sobre todo as mais novas, non van poder asistir.  No centro cívico hai salas, por se chove, que se poderían solicitar para isto. Se non chove, poden estar no parque. Precisamos dúas persoas voluntarias que coordinen esta actividade. Estamos falando ao mellor de 10 nenos e nenas.

***